Leiar i Norges Skiveteraner, Terje Breivik, er på plass i Asiago, og er svært begeistra.

– Sjølv om føret i dag var i tråaste laget for ein vestlending, er det reine eldoradoet her. Den lokale arrangøren har gjort ein fantastisk jobb med løypene, og når vergudane i tillegg spelar på lag med oss slik som no, kan ikkje langrennarar ha det betre, seier Breivik.

Norge stiller i år med 52 løparar. Sjølv om det er fleire i troppen som har medaljeambisjonar, er det langt frå det viktigaste for deltakarane.

– Det beste med Veteran-VM er venskapet og fellesskapet. Her treffer ein gamle vener og konkurrentar og får nye, både norske og andre nasjonalitetar. Og det som ikkje vert diskuert av glid, feste, skispenn og kreative teoriar som sikrar superski, har vel knapt nokon tenkt på enno, smiler Breivik.

I følgje Breivik er Veteran-VM tre ultimate «turrenn» fordelte på ei veke. Og stafett som rein bonus for dei som vert uttekne til den.

– Som i eitkvart turrenn finn ein nokon å konkurrera mot, uansett kor fort ein går. I tillegg er det fellesstart for kvar einaste klasse, som gjer det enkelt å halde oversikt og vite korleis ein ligg an undervegs. I dei fleste klassane held dei beste verdsklassenivå, så det manglar heller ikkje på utfordringar for dei mest ambisiøse, avsluttar Breivik.

—

Se også
Startlister Veteran-VM (forhåndsomtale her på Langrenn.com).